គណៈកម្មាធិការជាតិរៀបចំការបោះឆ្នោត (គ.ជ.ប) បានអភិវឌ្ឍកម្មវិធីទូរស័ព្ទដៃទំនើប (App) «NEC KH» របស់ខ្លួន ដោយបានបញ្ចូលមុខងារថ្មីចំនួន ៣ បន្ថែមទៀត គឺ “ទីតាំងការិយាល័យ បញ្ជីបេក្ខជនឈរឈ្មោះបោះឆ្នោត និង លទ្ធផលបោះឆ្នោត” ដើម្បីផ្ដល់ភាពងាយស្រួលជូនប្រជាពលរដ្ឋ និងភាគីពាក់ព័ន្ធនឹងការបោះឆ្នោត ក្នុងការស្វែងរកព័ត៌មានអំពីទីតាំងគណៈកម្មការរាជធានី ខេត្តរៀបចំការបោះឆ្នោត សាលាឃុំ សង្កាត់ ទីស្នាក់ការគណៈកម្មការឃុំ សង្កាត់រៀបចំការបោះឆ្នោត និងទីតាំងការិយាល័យបោះឆ្នោតទូទាំងប្រទេស ងាយស្រួលក្នុងការពិនិត្យមើលបញ្ជីបេក្ខជនឈរឈ្មោះ ក៏ដូចជាលំដាប់លេខរៀងបញ្ជីបេក្ខជនឈរឈ្មោះលើសន្លឹកឆ្នោតក្នុងឃុំ សង្កាត់ និងព័ត៌មានអំពីលទ្ធផលនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២។
ដើម្បីប្រើប្រាស់មុខងារទាំង ៣ ខាងលើនេះបាន សាធារណជនដែលមានកម្មវិធី «NEC KH» ក្នុងទូរស័ព្ទដៃរបស់ខ្លួនរួចហើយ គឺគ្រាន់តែធ្វើការដំឡើងជំនាន់ថ្មី (Update Version) ជាការស្រេច។ ចំពោះអ្នកដែលមិនទាន់មានកម្មវិធី «NEC KH» ហើយចង់ទាញយកកម្មវិធីនេះមកប្រើប្រាស់ សូមចូលទៅកាន់ Play Store សម្រាប់ទូរស័ព្ទប្រើប្រព័ន្ធប្រតិបត្តិការ Android ឬ App Store សម្រាប់ទូរស័ព្ទប្រើប្រព័ន្ធប្រតិបត្តិការ iOS ហើយវាយដោយស្វែងរកពាក្យ «NEC KH» រួចធ្វើការដំឡើងជាការស្រេច។
សូមជម្រាបជូនថា អ្នកប្រើប្រាស់កម្មវិធី «NEC KH» អាចចូលមើល ឬស្វែងរកអត្ថបទ កម្រងឯកសារ រូបភាព វីដេអូផ្សេងៗ ដែល គ.ជ.ប ផលិតឡើងដើម្បីផ្សព្វផ្សាយ និងអប់រំបណ្ដុះបណ្ដាលអ្នកបោះឆ្នោត ហើយសាធារណជនក៏អាចពិនិត្យមើលបញ្ជីបេក្ខជនឈរឈ្មោះបោះឆ្នោត និងស្វែងរកព័ត៌មានអំពីលទ្ធផលបោះឆ្នោត និងទីតាំងដែលបានជម្រាបជូនខាងលើនេះផងដែរ៕
