សេចក្តីប្រកាសព័ត៌មាន លេខ ០២២៖ ឆ្នាំ២០១៩ គ.ជ.ប មានផែនការចុះឈ្មោះអ្នកបោះឆ្នោតថ្មី ចំនួន ៣៧២,៦២៨ នាក់

យោង​តាម​ស្ថិតិ​ប្រជាពលរដ្ឋ​ប៉ាន់ស្មាន​ឆ្នាំ២០១៩​ ​អ្នក​ដែល​មាន​អាយុ​ចាប់ពី​ ​១៨​ ​ឡើង​ទៅ​ ​មាន​ចំនួន​ ​១០,១៧៨,៨០៩​ ​នាក់​ ​ហើយ​ ​គ.ជ.ប​ ​មាន​ផែនការ​ចុះឈ្មោះ​អ្នកបោះឆ្នោត​ថ្មី​ចំនួន​ ​៣៧២,៦២៨​ ​នាក់​ ​និង​អ្នក​ដែល​ត្រូវ​លុបឈ្មោះ​ចេញពី​បញ្ជី​បោះឆ្នោត​មាន​ចំនួន​ ​៨៨,៦២៦​ ​នាក់​ ​។​ ​អ្នក​ដែល​មានឈ្មោះ​ក្នុង​បញ្ជី​បោះឆ្នោត​ ​ឆ្នាំ២០១៨​ ​មាន​ចំនួន​ ​៨,៥៤៤,៨៨៥​ ​នាក់​ ​និង​ការិយាល័យ​បោះឆ្នោត​ ​ឆ្នាំ២០១៩​ ​មាន​ចំនួន​ ​២៣,៣៦៤​ ​ការិយាល័យ​ ​www.nec.gov.kh​/​khmer​/​content​/​3837​ ​។​ ​នេះ​ជា​ការ​អះអាង​របស់​ឯកឧត្តម​ ​នុត​ ​សុខុម​ ​អនុប្រធាន​ ​គ.ជ.ប​ ​ដែល​បាន​អញ្ជើញ​ជា​អធិបតី​ក្នុង​កិច្ចប្រជុំ​ជាមួយ​ភាគី​ពាក់ព័ន្ធ​ ​ស្តី​ពី​ការប្រកាស​ផ្សព្វផ្សាយ​ប្រតិទិន​ ​នៃ​ការពិនិត្យ​បញ្ជី​ឈ្មោះ​ ​និង​ការ​ចុះឈ្មោះ​បោះឆ្នោត​ ​ឆ្នាំ២០១៩​ ​និង​ការ​ផ្សព្វផ្សាយ​ស្ថិតិ​ប្រជាពលរដ្ឋ​ ​និង​ចំនួន​ការិយាល័យ​បោះឆ្នោត​ប៉ាន់ស្មាន​ ​នៅ​សាលសន្និសីទ​សារព័ត៌មាន​ ​គ.ជ.ប​ ​នា​ព្រឹក​ថ្ងៃទី២៩​ ​ខែមីនា​ ​ឆ្នាំ២០១៩​។​
​ភាគី​ពាក់ព័ន្ធ​ដែល​ចូលរួម​កិច្ចប្រជុំ​នេះ​រួមមាន​ ​៖​ ​តំណាង​ក្រុមប្រឹក្សា​ធម្មនុញ្ញ​ ​ព្រឹទ្ធសភា​ ​រដ្ឋសភា​ ​ក្រសួងមហាផ្ទៃ​ ​ក្រសួងព័ត៌មាន​ ​ស្ថានទូត​ជប៉ុន​ ​អង្គការ​មិនមែន​រដ្ឋាភិបាល​ចំនួន​ ​៦​ ​គណបក្ស​នយោបាយ​ ​ចំនួន​ ​១៤​ ​អង្គភាព​សារព័ត៌មាន​ចំនួន​ ​៨​ ​និង​មន្ត្រី​នៃ​ទី​ស្តី​ការ​ ​គ.ជ.ប​ ​សរុប​អ្នកចូលរួម​មាន​ចំនួន​ ​៦០​ ​នាក់​។​
​ឯកឧត្តម​អនុប្រធាន​ ​បាន​បន្ថែម​ថា​ ​ការពិនិត្យ​បញ្ជី​ឈ្មោះ​ ​និង​ការ​ចុះឈ្មោះ​បោះឆ្នោត​ ​ឆ្នាំ២០១៩​ ​នេះ​ ​ដូចគ្នានឹង​ឆ្នាំ​កន្លងទៅ​ដែរ​ ​គឺ​មាន​គោលដៅ​ធានា​ឱ្យ​បញ្ជី​បោះឆ្នោត​មាន​ភាព​ពេញលេញ​ ​ភាព​ត្រឹមត្រូវ​ ​និង​មាន​បច្ចុប្បន្នភាព​ប្រកបដោយ​សុវត្ថិភាព​ ​តាមរយៈ​ ​៖​
​១​.​    ​ការ​ចុះឈ្មោះ​បោះឆ្នោត​ ​ចំពោះ​ ​៖​

  • ​​ប្រជាពលរដ្ឋ​ខ្មែរ​ដែល​មាន​សិទ្ធិ​បោះឆ្នោត​ ​ហើយ​មិនទាន់​បាន​ចុះឈ្មោះ​បោះឆ្នោត​ពីមុន​មក​
  • ប្រជាពលរដ្ឋ​ខ្មែរ​ដែល​ទើប​គ្រប់​អាយុ​ ​១៨ឆ្នាំ​ ​(​កើតមុន​ ​ឬ​កើត​ត្រឹម​ថ្ងៃទី១​ ​ខែសីហា​ ​ឆ្នាំ២០០១​)​
  • ប្រជាពលរដ្ឋ​ខ្មែរ​ដែល​បាន​ផ្លាស់​លំនៅឋាន​ ​ឬ​ទីសំណាក់​ចូលក្នុង​ឃុំ​ ​សង្កាត់​ថ្មី​ ​ត្រូវ​ទៅចុះ​ឈ្មោះ​បោះឆ្នោត​នៅ​តាម​ឃុំ​ ​សង្កាត់​ដែល​សាមីខ្លួន​ត្រូវ​បោះឆ្នោត​ ​។​

​២​.​    ​ការ​កែតម្រូវ​ឈ្មោះ​ ​ឬ​ទិន្នន័យ​អ្នកបោះឆ្នោត​ ​តាម​សំណើ​របស់​សាមីខ្លួន​ដោយ​ផ្អែកលើ​ឯកសារ​សំអាង​ត្រឹមត្រូវ​ ​។​
​៣​.​ ​ការ​ស្រង់​ ​និង​លុបឈ្មោះ​អ្នកបោះឆ្នោត​

  • ​​ដែល​បាន​ទទួលមរណភាព​
  • ដែល​ត្រូវ​បាន​ដកហូត​សិទ្ធិ​បោះឆ្នោត​ជា​បណ្តោះអាសន្ន​
  • ​ដែល​បាន​ផ្លាស់​លំនៅឋាន​ ​ឬ​ទីសំណាក់​ចេញទៅ​ឃុំ​ ​សង្កាត់​ផ្សេង​

​ដែល​មាន​ឯកសារ​ជា​សំអាង​ត្រឹមត្រូវ​ ​និង​ច្បាស់លាស់​ ​ដើម្បី​លុបចេញ​ពី​បញ្ជី​បោះឆ្នោត​ ​។​

ឆ្លៀត​ក្នុង​ឱកាស​នេះ​ ​ឯកឧត្តម​ក៏បាន​អំពាវនាវ​ដល់​គណបក្ស​នយោបាយ​ ​អង្គការ​មិនមែន​រដ្ឋាភិបាល​ជាតិ​ ​និង​អន្តរជាតិ​ ​ចូលរួម​ដាក់​ភ្នាក់ងារ​ ​ឬ​អ្នកសង្កេតការណ៍​របស់​ខ្លួន​ ​ដើម្បី​តាមដាន​ ​និង​ពិនិត្យមើល​ដំណើរការ​នេះ​នៅ​តាម​ការិយាល័យ​ចុះឈ្មោះ​បោះឆ្នោត​ ​ដើម្បី​ធានា​ការអនុវត្ត​ឱ្យ​បាន​រលូន​ ​និង​ជោគជ័យ​ ​និង​បាន​អំពាវនាវ​ឱ្យ​អាជ្ញាធរ​គ្រប់​លំដាប់ថ្នាក់​ចូលរួម​សហការ​ ​និង​ថែរក្សា​ ​ការពារ​សន្តិសុខ​ ​និង​ធានា​បាន​នូវ​សុវត្ថិភាព​ជូន​ដល់​ប្រជាពលរដ្ឋ​។​
​សូមជម្រាប​ជូន​ថា​ ​ការពិនិត្យ​បញ្ជី​ឈ្មោះ​ ​និង​ការ​ចុះឈ្មោះ​បោះឆ្នោត​ ​ឆ្នាំ២០១៩​ ​ត្រូវ​ធ្វើឡើង​នៅ​តាម​សាលាឃុំ​ ​សង្កាត់​ ​និង​នៅ​តាម​ភូមិ​មួយចំនួន​នៅក្នុង​ឃុំ​ ​សង្កាត់​ ​ដែល​មាន​រយៈពេល​ ​២២ថ្ងៃ​ ​ដោយ​បែងចែក​ពេលវេលា​ដូច​ខាងក្រោម​ ​៖​

  • ​​រយៈពេល​ ​៦ថ្ងៃ​ ​ពី​ថ្ងៃទី១​ ​ដល់​ថ្ងៃទី៦​ ​ខែឧសភា​ ​ចុះឈ្មោះ​នៅ​តាម​សាលាឃុំ​ ​សង្កាត់​
  • ​រយៈពេល​ ​១១ថ្ងៃ​ ​ពី​ថ្ងៃទី៧​ ​ដល់​ថ្ងៃទី១៧​ ​ខែឧសភា​ ​ចុះឈ្មោះ​ចល័ត​តាម​ភូមិ​មួយចំនួន​ក្នុង​ឃុំ​ ​សង្កាត់​
  • រយៈពេល​ ​៥ថ្ងៃ​ ​ពី​ថ្ងៃទី១៨​ ​ដល់​ថ្ងៃទី២២​ ​ខែឧសភា​ ​ត្រឡប់​មក​ចុះឈ្មោះ​នៅ​តាម​សាលាឃុំ​ ​សង្កាត់​វិញ​ ​៕​

It appears your Web browser is not configured to display PDF files. Download adobe Acrobat or click here to download the PDF file.

Click here to download the PDF file.
ចែករំលែក(Share)
មន្ត្រី​​​ទទួល​បន្ទុក​​គេហទំព័រ​៖ 096 69 09 778