នៅថ្ងៃទី០២ ខែឧសភា ឆ្នាំ២០១៧ វេលាម៉ោង ០៩:០០ព្រឹក គណៈកម្មាធិការជាតិរៀបចំការបោះឆ្នោត (គ.ជ.ប) បានរៀបចំកិច្ចប្រជុំផ្សព្វផ្សាយជាមួយស្ថានីយ៍វិទ្យុ និងទូរទស្សន៍ឯកជន ស្តីពី "គោលការណ៍ សម្រាប់ស្ថានីយ៍វិទ្យុ និងទូរទស្សន៍ ក្នុងការលក់ ឬជួលម៉ោងផ្សព្វផ្សាយ ឱ្យគណបក្សនយោបាយ ដើម្បីធ្វើការផ្សព្វផ្សាយអំពីគោលនយោបាយ និងកម្មវិធីនយោបាយរបស់គណបក្ស ក្នុងអំឡុងពេលឃោសនាបោះឆ្នោត" សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ ឆ្នាំ២០១៧ ក្រោមអធិបតីភាព ឯកឧត្តម ទេព នីថា អគ្គលេខាធិការ គ.ជ.ប។
ភាគីពាក់ព័ន្ធដែលចូលរួមកិច្ចប្រជុំនេះរួមមាន ៖ តំណាងក្រសួងព័ត៌មាន តំណាងស្ថានីយ៍វិទ្យុ និងទូរទស្សន៍ចំនួន ៣ តំណាងគណបក្សនយោបាយ និងអ្នកសារព័ត៌មាន សរុបមានអ្នកចូលរួមចំនួន ២៣ នាក់។
ឯកឧត្តម ទេព នីថា អគ្គលេខាធិការ គ.ជ.ប មានប្រសាសន៍ថា ចំពោះស្ថានវិទ្យុណាដែលបានជួលម៉ោងឱ្យគណបក្សនយោបាយផ្សព្វផ្សាយជារៀងរាល់ថ្ងៃ គួរតែពិនិត្យលទ្ធភាពនៃការផ្សព្វផ្សាយឡើងវិញក្នុងរយៈពេល ១៤ថ្ងៃ អំឡុងពេលឃោសនាបោះឆ្នោត ដើម្បីផ្តល់យុតិ្តធម៌ និងភាពសមស្របមួយដល់គណបក្សនយោបាយទាំងអស់ដែលបានឈរឈ្មោះបោះឆ្នោត ។ ឯកឧត្តមបន្តថា គ.ជ.ប បានកំណត់គោលការណ៍ផ្សព្វផ្សាយចំនួន ២ ដល់ភាគីពាក់ព័ន្ធ ក្នុងអំឡុងពេលឃោសនាបោះឆ្នោត។ គោលការណ៍ទាំង ២ រួមមាន ៖
- គោលការណ៍សម្រាប់ស្ថានីយ៍វិទ្យុ និងទូរទស្សន៍ ក្នុងការលក់ ឬជួលម៉ោងផ្សព្វផ្សាយឱ្យគណបក្សនយោបាយ ដើម្បីធ្វើការផ្សព្វផ្សាយអំពីគោលនយោបាយ និង កម្មវិធីនយោបាយរបស់គណបក្ស
- គោលការណ៍សម្រាប់អង្គការមិនមែនរដ្ឋាភិបាលជាតិ អន្តរជាតិ និងប្រព័ន្ធផ្សព្វផ្សាយព័ត៌មាន ស្តីពីការរៀបចំកម្មវិធីសំណួរចម្លើយ ឬពិភាក្សា អំពីគោលនយោបាយរបស់គណបក្សនយោបាយ។
សូមបញ្ជាក់ថា ព័ត៌មានលម្អិតអំពីគោលការណ៍ទាំង ២ ខាងលើនេះ មានបង្ហោះនៅលើគេហទំព័ររបស់ គ.ជ.ប www.nec.gov.kh៕