នាព្រឹកថ្ងៃអង្គារ ទី៨ ខែកញ្ញា ឆ្នាំ២០២៦ វេលាម៉ោង ៩:០០ នៅសាលប្រជុំរបស់គណៈកម្មាធិការជាតិរៀបចំការបោះឆ្នោត (គ.ជ.ប) មានបើកកិច្ចប្រជុំក្រោមអធិបតីភាពដ៏ខ្ពង់ខ្ពស់ ឯកឧត្ដម ប្រាជ្ញ ចន្ទ ប្រធាន គ.ជ.ប ដើម្បីពិនិត្យ និងសម្រេចលើកំណត់ហេតុនៃកិច្ចប្រជុំ គ.ជ.ប ខ្លឹមសារសម្ភារឯកសារបោះឆ្នោតសម្រាប់ប្រើប្រាស់ក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៦ គំរូទម្រង់សន្លឹកឆ្នោត និងសម្រេចលើរបាយការណ៍ធ្វើបច្ចុប្បន្នភាពស្ថានភាពប្រជាពលរដ្ឋ អ្នកបោះឆ្នោត និងទីតាំងការិយាល័យបោះឆ្នោត ដែលរងផលប៉ះពាល់ដោយការឈ្លានពានលើអធិបតេយ្យភាព និងបូរណភាពទឹកដីកម្ពុជាពីយោធាថៃ ព្រមទាំងសម្រេចលើតារាងស្ថិតិប្រជាពលរដ្ឋ និងចំនួនការិយាល័យបោះឆ្នោតប៉ាន់ស្មាន សម្រាប់អនុវត្តផែនការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦។
បន្ទាប់ពីបានស្តាប់របាយការណ៍របស់អង្គភាពជំនាញនៃអគ្គលេខាធិការដ្ឋាន គ.ជ.ប ពាក់ព័ន្ធនឹងឯកសារដែលមានក្នុងរបៀបវារៈរួចមក អង្គប្រជុំ គ.ជ.ប បានពិនិត្យ និងពិភាក្សាលើឯកសារយ៉ាងល្អិតល្អន់តាមរបៀបវារៈម្តងមួយៗ និងបានលើកយោបល់កែសម្រួលខ្លឹមសារ និងពាក្យពេចន៍មួយចំនួន ហើយអង្គប្រជុំ គ.ជ.ប បានសម្រេចដូចខាងក្រោម៖
១. របៀបវារៈទី១៖ អង្គប្រជុំ គ.ជ.ប បានពិនិត្យ និងពិភាក្សាកែសម្រួល ហើយបានឯកភាពលើកំណត់ហេតុនៃកិច្ចប្រជុំ គ.ជ.ប ថ្ងៃទី២១ ខែកក្កដា ឆ្នាំ២០២៦។
២. របៀបវារៈទី២៖ អង្គប្រជុំ គ.ជ.ប បានពិនិត្យ និងពិភាក្សាលើសម្ភារឯកសារបោះឆ្នោតសម្រាប់ប្រើប្រាស់ក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៦ ឆ្នាំ២០២៧។ អង្គប្រជុំ គ.ជ.ប បានពិភាក្សាកែសម្រួល ហើយបានសម្រេចឯកភាពដូចខាងក្រោម រួមមាន៖
- ទម្រង់បែបបទ ចំនួន ១៩ ប្រភេទ
- ស្រោមសំបុត្រខ្នាតធំ មធ្យម និងតូច មានចំនួន ២២ ប្រភេទ សម្រាប់ប្រើក្នុងការិយាល័យបោះឆ្នោត
- ស្បោងដាក់សម្ភារឯកសារបោះឆ្នោត ចំនួន ១១ ប្រភេទ
- បណ្ណប្រកាសហាមប្រើប្រាស់ទូរសព្ទដៃ និងខិត្តបណ្ណណែនាំអំពីការបោះឆ្នោតបាន ឬមិនបាន
- ស្លាកសម្គាល់ទីស្នាក់ការគណៈកម្មការឃុំ សង្កាត់រៀបចំការបោះឆ្នោត (គឃ.សប) និងស្លាកសម្គាល់ការិយាល័យបោះឆ្នោត
- គំរូត្រា ៣ ប្រភេទ រួមមាន ត្រាសម្រាប់ គឃ.សប ត្រាសម្រាប់គណៈកម្មការការិយាល័យបោះឆ្នោត (គ.ក.ប) និងត្រាសម្ងាត់។
៣. របៀបវារៈទី៣៖ អង្គប្រជុំ គ.ជ.ប ពិនិត្យ និងពិភាក្សាលើទម្រង់សន្លឹកឆ្នោតគំរូសម្រាប់ប្រើប្រាស់ក្នុងការបណ្តុះបណ្តាលមន្ត្រីបោះឆ្នោត និងអប់រំអ្នកបោះឆ្នោត និងទម្រង់សន្លឹកឆ្នោតផ្លូវការ ដែលត្រូវរៀបចំតាមទម្រង់ និងខ្នាតលើក្រដាសជាក់ស្តែងប្រែប្រួលទៅតាមចំនួនគណបក្សនយោបាយដែលឈរឈ្មោះបោះឆ្នោតក្នុងឃុំ សង្កាត់ សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៦ ឆ្នាំ២០២៧ ដែលមានគំរូទម្រង់សន្លឹកឆ្នោតបួនខ្នាតផ្សេងៗគ្នា។ ក្រោយពីបានពិភាក្សាយ៉ាងល្អិតល្អន់រួចមក អង្គប្រជុំ គ.ជ.ប បានសម្រេចឯកភាពយកពីរជួរ ក្នុងករណីមានគណបក្សនយោបាយចូលរួមការបោះឆ្នោតលើសពីដប់មួយគណបក្សដោយសម្រួលទំហំកូឡោន (Column) ឱ្យប៉ុនៗគ្នាសមស្របនៅលើក្រដាសសន្លឹកឆ្នោត។
៤. របៀបវារៈទី៤៖ អង្គប្រជុំ គ.ជ.ប បានពិនិត្យលើរបាយការណ៍អំពីការធ្វើបច្ចុប្បន្នភាពស្ថានភាពប្រជាពលរដ្ឋ អ្នកបោះឆ្នោត ទីតាំងការិយាល័យបោះឆ្នោត ដែលរងផលប៉ះពាល់ដោយការឈ្លានពានលើអធិបតេយ្យភាព និងបូរណភាពទឹកដីកម្ពុជាពីយោធាថៃ រួមមានខេត្តបន្ទាយ-មានជ័យ ខេត្តព្រះវិហារ ខេត្តពោធិ៍សាត់ និងខេត្តឧត្តរមានជ័យ ដែលមាន៖
- ប្រជាពលរដ្ឋសរុបចំនួន ២១.២១១ (ពីរម៉ឺនមួយពាន់ពីររយដប់មួយ) នាក់ ក្នុងនោះប្រជាពលរដ្ឋដែលមានអាយុចាប់ពី ១៨ឆ្នាំឡើង សរុបចំនួន ១៣.២៧៩ (មួយម៉ឺនបីពាន់ពីររយចិតសិបប្រាំបួន) នាក់
- អ្នកបោះឆ្នោតសរុបចំនួន ១០.៨៩៩ (មួយម៉ឺនប្រាំបីរយកៅសិបប្រាំបួន) នាក់
- ការិយាល័យបោះឆ្នោតសរុបចំនួន ២៨ ការិយាល័យ
- ភូមិសរុបចំនួន ២៣ ស្ថិតក្នុងភូមិសាស្រ្តឃុំ សង្កាត់សរុបចំនួន ១១ និងក្រុង ស្រុកចំនួន ៧។
បន្ទាប់ពីបានស្តាប់ និងពិនិត្យលើរបាយការណ៍របស់អគ្គលេខាធិការដ្ឋាន គ.ជ.ប យ៉ាងយកចិត្តទុកដាក់រួចមក អង្គប្រជុំ គ.ជ.ប បានសម្រេចឯកភាពរក្សាវិធានការ ដែល គ.ជ.ប បានដាក់ចេញកន្លងមក រួមមាន៖
- រក្សាទុកស្ថានភាពការិយាល័យបោះឆ្នោតរងផលប៉ះពាល់សរុបចំនួន ២៨ ការិយាល័យក្នុងភូមិសាស្ត្រដដែល ដើម្បីរក្សាជាសក្ខីកម្មបញ្ជាក់ពីផលប៉ះពាល់។
- នៅដំណាក់កាលបោះឆ្នោត គណៈកម្មការខេត្តរៀបចំការបោះឆ្នោត (គ.ខ.ប) ត្រូវពិគ្រោះយោបល់ និងសហការជាមួយអាជ្ញាធរមានសមត្ថកិច្ច ធ្វើការផ្លាស់ប្ដូរជាបណ្តោះអាសន្នទីតាំងការិយាល័យបោះឆ្នោតដែលរងផលប៉ះពាល់ ទៅទីតាំងដែលមានសុវត្ថិភាពក្នុងក្របខ័ណ្ឌព្រំប្រទល់ឃុំ សង្កាត់ដដែល ដែលអាចឱ្យអ្នកបោះឆ្នោតទៅបោះឆ្នោតបានដោយសុវត្ថិភាព។
- លេខាធិការដ្ឋានរៀបចំការបោះឆ្នោតខេត្ត (ល.ខ.ប) ក្រុមប្រឹក្សាឃុំ សង្កាត់ (កបឃ.ស) និង ក្រុមចុះឈ្មោះបោះឆ្នោត (ក.ច.ប) ត្រូវសហការកំណត់ទីតាំងការិយាល័យចុះឈ្មោះបោះឆ្នោតចល័តនៅតាមភូមិ ក្នុងឃុំ សង្កាត់សាមីដែលជិតបំផុតដែលមានមណ្ឌលភៀសសឹក ឬភូមិដែលត្រូវបានរំលោភកាន់កាប់ដើម្បីឱ្យប្រជាពលរដ្ឋបានទៅពិនិត្យបញ្ជីឈ្មោះ និងចុះឈ្មោះបោះឆ្នោត ឬទៅធ្វើការកែតម្រូវទិន្នន័យជីវប្រវត្តិ ឬធ្វើបច្ចុប្បន្នភាពទិន្នន័យជីវមាត្រ។
- ល.ខ.ប កបឃ.ស ក.ច.ប និង គ.ខ.ប គឃ.សប ត្រូវយកចិត្តទុកដាក់សហការបង្កលក្ខណៈងាយស្រួលក្នុងការចេញឯកសារដើម្បីបំពេញលក្ខខណ្ឌចុះឈ្មោះបោះឆ្នោត និងបោះឆ្នោតជូនដល់ប្រជាពលរដ្ឋ ពិសេសប្រជាពលរដ្ឋដែលពុំមានឯកសារអ្វីទាំងអស់នៅតំបន់ដែលត្រូវបានរំលោភកាន់កាប់ និងនៅជម្រកភៀសសឹក។
- អាជ្ញាធរខេត្ត ក្រុង ស្រុក ល.ខ.ប ឬ គ.ខ.ប ពាក់ព័ន្ធ ត្រូវបង្កលក្ខណៈងាយស្រួល និងលើកទឹកចិត្តប្រជាពលរដ្ឋ និងអ្នកបោះឆ្នោតដែលស្នាក់នៅតាមទីតាំងបណ្តោះអាសន្នក្នុងខេត្ត ស្រុក បានទៅពិនិត្យបញ្ជីឈ្មោះ និងចុះ ឈ្មោះបោះឆ្នោតនៅតាមឃុំ សង្កាត់ដែលគាត់បានរស់នៅមុនពេលភៀសសឹក ឬ/និងទៅបោះឆ្នោតតាមការិយាល័យបោះឆ្នោតដែលរងផលប៉ះពាល់ហើយត្រូវបានប្តូរទៅទីតាំងសុវត្ថិភាពជាបណ្ដោះអាសន្ន។
៥. របៀបវារៈទី៥៖ អង្គប្រជុំ គ.ជ.ប បានពិនិត្យ និងពិភាក្សាលើតារាងស្ថិតិប្រជាពលរដ្ឋ និងចំនួនការិយាល័យបោះឆ្នោតប៉ាន់ស្មាន សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦ ហើយអង្គប្រជុំសម្រេចឯកភាពបន្ថែមកូឡោន (Column) ដាក់ចំនួនប៉ាន់ស្មានអ្នកធ្វើបច្ចុប្បន្នភាពទិន្នន័យជីវមាត្រ។ តារាងស្ថិតិប្រជាពលរដ្ឋ និងចំនួនការិយាល័យបោះឆ្នោតប៉ាន់ស្មានសម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦ នេះ នឹងត្រូវធ្វើការផ្សព្វផ្សាយជាសាធារណៈនៅពេលខាងមុខ។
អង្គប្រជុំ គ.ជ.ប បានប្រកាសបិទបញ្ចប់ដោយ ឯកឧត្ដម ប្រាជ្ញ ចន្ទ ប្រធាន គ.ជ.ប នៅវេលាម៉ោង ១០:៥៦ នាទីព្រឹកនាថ្ងៃខែឆ្នាំដដែល៕
