គណៈកម្មាធិការជាតិរៀបចំការបោះឆ្នោត (គ.ជ.ប) នឹងរៀបចំវគ្គបណ្តុះបណ្តាលស្ដីពី “ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦” ជូនដល់លេខាធិការដ្ឋានរាជធានី ខេត្តរៀបចំការបោះឆ្នោត (លធ.ខប) តំណាងគណបក្សនយោបាយ តំណាងសមាគម និងអង្គការមិនមែនរដ្ឋាភិបាល រយៈពេល ៣ថ្ងៃ គឺចាប់ពីថ្ងៃទី២៤ ដល់ថ្ងៃទី២៦ ខែសីហា ឆ្នាំ២០២៦។
វគ្គបណ្ដុះបណ្ដាលនេះ នឹងធ្វើឡើងនៅសាលសន្និសីទសារព័ត៌មាននៃទីស្ដីការ គ.ជ.ប (ជាន់ទី៥) ស្ថិតនៅមហាវិថីសម្តេចសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ ក្នុងនោះពិធីបើក និងពិធីបិទវគ្គ នឹងប្រព្រឹត្តទៅដូចខាងក្រោម៖
- នៅព្រឹកថ្ងៃទី២៤ ខែសីហា ឆ្នាំ២០២៦ វេលាម៉ោង ៨:០០ ឯកឧត្តម ទេព នីថា អគ្គលេខាធិការ គ.ជ.ប នឹងអញ្ជើញជាអធិបតីថ្លែងសុន្ទរកថាបើកវគ្គ
- នៅរសៀលថ្ងៃទី២៦ ខែសីហា ឆ្នាំ២០២៦ វេលាម៉ោង ៤:៣០នាទី ឯកឧត្តម ប្រាជ្ញ ចន្ទ ប្រធាន គ.ជ.ប នឹងអញ្ជើញជាអធិបតីដ៏ខ្ពង់ខ្ពស់ថ្លែងសុន្ទរកថាបិទវគ្គ។
សូមអញ្ជើញអ្នកសារព័ត៌មានចូលរួមក្នុងកម្មវិធីនេះ កុំបីខាន៕
