សេចក្តីប្រកាសព័ត៌មាន លេខ ០០៧៖ ការបោះឆ្នោតលើកទី១ ដើម្បីជ្រើសរើសសមាជិកក្រុមប្រឹក្សាក្រុងបូកគោនៃខេត្តកំពត នឹងប្រព្រឹត្តទៅនៅថ្ងៃទី២៥ ខែកក្កដា ឆ្នាំ២០២១

ការបោះឆ្នោតលើកទី១ ដើម្បីជ្រើសរើសសមាជិកក្រុមប្រឹក្សាក្រុងបូកគោ នៃខេត្តកំពត ត្រូវធ្វើឡើងនៅថ្ងៃទី២៥ ខែកក្កដា ឆ្នាំ២០២១ នេះបើយោងសេចក្តីសម្រេចរបស់រាជរដ្ឋាភិបាលកម្ពុជា លេខ ៤៧ សសរ ចុះថ្ងៃទី១២ ខែមេសា ឆ្នាំ២០២១ ស្តីពីការប្រកាសកាលបរិច្ឆេទ នៃការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោ នៃខេត្តកំពត។

យោងតាមអនុក្រឹត្យរបស់រាជរដ្ឋាភិបាលកម្ពុជា លេខ ៦៧ អនក្រ.បក ចុះថ្ងៃទី១២ ខែមេសា ឆ្នាំ២០២១ ស្តីពីការកំណត់ចំនួនសមាជិកក្រុមប្រឹក្សាក្រុងបូកគោនៃខេត្តកំពត សម្រាប់អាណត្តិទី១ មាត្រា១ “ ត្រូវបានកំណត់ចំនួនសមាជិកក្រុមប្រឹក្សាក្រុងបូកគោ នៃខេត្តកំពត សម្រាប់អាណត្តិទី១ មានចំនួន ១៣នាក់ ដោយអនុលោមតាមមាត្រា ១៨ថ្មី នៃច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ” ។

ការបោះឆ្នោតជ្រើសរើសសមាជិកក្រុមប្រឹក្សាក្រុងបូកគោ មានអ្នកបោះឆ្នោតសរុបចំនួន ១៧រូប ជាក្រុមប្រឹក្សាសង្កាត់ក្នុងមុខតំណែងនៃសង្កាត់ចំនួន ៣ រួមមាន៖

  • សង្កាត់បឹងទូក មានអង្គបោះឆ្នោតចំនួន ៥រូប
  • សង្កាត់កោះតូច មានអង្គបោះឆ្នោតចំនួន ៥រូប
  • សង្កាត់ព្រែកត្នោត មានអង្គបោះឆ្នោតចំនួន ៧រូប

យោងតាមមាត្រា ១៤ នៃច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ និងច្បាប់ស្តីពីវិសោធនកម្មនៃច្បាប់នេះ រាជធានី ខេត្ត ក្រុង ស្រុក ខណ្ឌ ត្រូវមានក្រុមប្រឹក្សារបស់ខ្លួន ដែលត្រូវបានជ្រើសរើសឡើងតាមការបោះឆ្នោតអសកល ស្របតាមនីតិវិធីដែលកំណត់ដោយច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌដែលហៅកាត់ថា “ ក្រុមប្រឹក្សា” ។

សូមបញ្ជាក់ថា ក្រុងបូកគោ នៃខេត្តកំពត គឺជាក្រុងដែលទើបតែបង្កើតថ្មី ដោយអនុក្រឹត្យរបស់រាជរដ្ឋាភិបាលកម្ពុជាលេខ ៣៨ អនក្រ.បក ចុះថ្ងៃទី១៦ ខែមីនា ឆ្នាំ២០២១។

 សេចក្ដីដូចបានគោរពជម្រាបជូនខាងលើ សូមសាធារណជន និងភាគីពាក់ព័ន្ធនឹងការបោះឆ្នោតទាំងអស់មេត្តាជ្រាប៕

ទាញយកកម្មវិធី(App) CamNEC News