ការបិទផ្សាយបញ្ជីឈ្មោះទីតាំងការិយាល័យបោះឆ្នោត និងការចុះឈ្មោះបោះឆ្នោត គឺជាការងារដែលគណៈកម្មាធិការជាតិរៀបចំការបោះឆ្នោត (គ.ជ.ប) ត្រូវរៀបចំក្នុងដំណាក់កាលនេះ ដើម្បីត្រៀមសម្រាប់ ការបោះឆ្នោតជ្រើសរើសក្រុមប្រឹក្សា អាណតិ្តទី៣ នៅថ្ងៃទី២៦ ខែឧសភា ឆ្នាំ២០១៩។ នេះជាការលើកឡើងរបស់ ឯកឧត្តម ហ៊ែល សារ៉ាត់ សមាជិក គ.ជ.ប ក្នុងកិច្ចប្រជុំជាមួយភាគីពាក់ព័ន្ធ ស្តីពីការបិទផ្សាយបញ្ជីឈ្មោះទីតាំងការិយាល័យបោះឆ្នោត និងការចុះឈ្មោះបោះឆ្នោត ការបញ្ជាក់តាមឋានានុក្រម និងការបញ្ជូនមក គ.ជ.ប នៅសាលសន្និសីទ គ.ជ.ប នាព្រឹកថ្ងៃទី២៥ ខែកុម្ភៈ ឆ្នាំ២០១៩ ។
ភាគីពាក់ព័ន្ធដែលបានចូលរួមកិច្ចប្រជុំនេះរួមមាន ៖ តំណាងក្រុមប្រឹក្សាធម្មនុញ្ញ ព្រឹទ្ធសភា រដ្ឋសភា ក្រសួងមហាផ្ទៃ ក្រសួងព័ត៌មាន គណបក្សនយោបាយ ចំនួន ១០ តំណាងស្ថានទូតជប៉ុន អង្គការមិនមែនរដ្ឋាភិបាលចំនួន ១១ អង្គភាពសារព័ត៌មានចំនួន ៨ និងមន្ត្រី គ.ជ.ប សរុបចំនួន ៩០នាក់។
ឯកឧត្តម ហ៊ែល សារ៉ាត់ បន្ថែមថា ការបិទផ្សាយបញ្ជីទីតាំងការិយាល័យបោះឆ្នោត ត្រូវធ្វើនៅថ្ងៃទី២៥ ខែកុម្ភៈ ឆ្នាំ២០១៩ នៅគណៈកម្មការរាជធានី ខេត្តរៀបចំការបោះឆ្នោត (គធ.ខប) និងនៅសាលាឃុំ សង្កាត់ទូទាំងប្រទេស និងមានផ្សព្វផ្សាយនៅគេហទំព័ររបស់ គ.ជ.ប ផងដែរ ។ ចំពោះការងារចុះឈ្មោះបោះឆ្នោតវិញ ឯកឧត្តមបានពន្យល់ថា ដោយសារការបោះឆ្នោតនេះ ជាការបោះឆ្នោតអសកល គឺមានតែសមាជិកក្រុមប្រឹក្សាឃុំ សង្កាត់ក្នុងតំណែងប៉ុណ្ណោះ ដែលជាអ្នកបោះឆ្នោតជ្រើសរើសក្រុមប្រឹក្សា ដូចនេះ ការចុះឈ្មោះបោះឆ្នោត គឺត្រូវធ្វើនៅតាមសាលាឃុំ សង្កាត់ តាមរបៀបស្រង់ឈ្មោះ បញ្ចូលទៅក្នុងបញ្ជីបោះឆ្នោត និងបញ្ជូនតាមឋានានុក្រមមក គ.ជ.ប ។ កាលបរិច្ឆេទនៃការចុះឈ្មោះបោះឆ្នោត ត្រូវចាប់ផ្តើមពីថ្ងៃទី៤ ដល់ថ្ងៃទី២៧ ខែមីនា ឆ្នាំ២០១៩ ដែលក្នុងរយៈពេលនេះ ចែកជាពីរដំណាក់កាល ៖
- ដំណាក់កាលទី១ គឺដំណាក់កាលចុះឈ្មោះអ្នកបោះឆ្នោតនៅតាមសាលាឃុំ សង្កាត់ ដែលមានរយៈពេល ១៣ថ្ងៃ ដោយមិនរាប់បញ្ចូលថ្ងៃអាទិត្យ និងថ្ងៃឈប់សម្រាកកំណត់ដោយរាជរដ្ឋាភិបាល ។
- ដំណាក់កាលទី២ បញ្ជូនបញ្ជីឈ្មោះដែលបានរៀបចំរួចពីឃុំ សង្កាត់តាមឋានានុក្រម (ពីឃុំ សង្កាត់ មកក្រុង ស្រុក ខណ្ឌ និងមករាជធានី ខេត្ត រួចមក គ.ជ.ប) ដែលមានរយៈពេល ៧ថ្ងៃ ។
ឯកឧត្តមបានឱ្យដឹងទៀតថា បញ្ជីបោះឆ្នោតដែលត្រូវបានស្រង់បញ្ចូលឈ្មោះរបស់ក្រុមប្រឹក្សាឃុំ សង្កាត់ក្នុងតំណែងរួចហើយ ត្រូវចុះហត្ថលេខាដោយមេឃុំ ចៅសង្កាត់ ហើយត្រូវបោះត្រារដ្ឋបាលឃុំ សង្កាត់ រួចបញ្ជូនទៅរដ្ឋបាលក្រុង ស្រុក ខណ្ឌ និងបន្តទៅរដ្ឋបាលរាជធានី ខេត្តពាក់ព័ន្ធ។ អភិបាលនៃគណៈអភិបាលក្រុង ស្រុក ខណ្ឌ និងអភិបាលនៃគណៈអភិបាលរាជធានី ខេត្តមានភារកិច្ចត្រួតពិនិត្យ ផ្ទៀងផ្ទាត់ និងបញ្ជាក់ឯកភាពលើបញ្ជីឈ្មោះសមាជិកក្រុមប្រឹក្សាឃុំ សង្កាត់នៅក្នុងមុខតំណែងនៃឃុំ សង្កាត់ទាំងអស់ដែលស្ថិតក្នុងក្រុង ស្រុក ខណ្ឌនៃរាជធានី ខេត្តពាក់ព័ន្ធ ក្នុងករណីបញ្ជីឈ្មោះសមាជិកក្រុមប្រឹក្សាឃុំ សង្កាត់នៅក្នុងមុខតំណែងនៃឃុំ សង្កាត់នីមួយៗមានលក្ខណៈត្រឹមត្រូវពិតប្រាកដ ។
សូមជម្រាបជូនថា នៅក្នុងដំណាក់កាលចុះឈ្មោះបោះឆ្នោត គណបក្សនយោបាយទាំងអស់ ដែលបានចុះបញ្ជីត្រឹមត្រូវតាមច្បាប់ស្តីពីគណបក្សនយោបាយនៅក្រសួងមហាផ្ទៃ មានសិទ្ធិចាត់តាំងភ្នាក់ងាររបស់ខ្លួន ដើម្បីចូលរួមពិនិត្យមើលដំណើរការនេះ ដោយត្រូវដាក់ពាក្យសុំទៅគណៈកម្មការរាជធានី ខេត្តរៀបចំការបោះឆ្នោត (គធ.ខប) ចាប់ពីថ្ងៃទី២៥ ខែកុម្ភៈ ឆ្នាំ២០១៩ ដល់ថ្ងៃទី១ ខែឧសភា ឆ្នាំ២០១៩ ។
