សេចក្តី​ប្រកាស​ព័ត៌មាន លេខ ០៤៦៖ គ.ជ.ប ត្រូវ​បាន​ទទួល​ស្គាល់​ជា​ស្ថាប័ន​ឯករាជ្យ និង​អព្យាក្រឹត

គណៈកម្មាធិការ​ជាតិ​រៀបចំ​ការ​បោះ​ឆ្នោត​(គ.ជ.ប) សូម​រំលឹកថា ការ​ចុះ​បញ្ជីគណ​បក្ស​នយោបាយ ឈរ​ឈ្មោះ​បោះ​ឆ្នោត និង​បញ្ជីបេក្ខជនឈរ​ឈ្មោះ សម្រាប់​ការ​បោះ​ឆ្នោត​ជ្រើស​តាំង​តំណាង​រាស្រ្ត នីតិកាលទី៦ ឆ្នាំ​២០១៨ ត្រូវ​ចាប់​ផ្តើម​នៅ​ថ្ងៃ​ចន្ទទី៣០ ខែ​មេសា រហូត​ដល់​ថ្ងៃ​ទី១៤ ខែឧសភា ឆ្នាំ​២០១៨ វេលា​ម៉ោង​១៧​និង​៣០​នាទី ។

ការ​ចុះ​បញ្ជី​នេះ បើក​ទូលាយ​ដល់​គ្រប់គណ​បក្ស​នយោបាយ ដែល​បាន​ចុះ​បញ្ជី​យ៉ាង​ត្រឹម​ត្រូវ​ស្រប​តាម​ច្បាប់​ស្តីពីគណ​បក្ស​នយោបាយ​នៅ​ក្រសួង​មហា​ផ្ទៃ ។ គណ​បក្ស និង​បេក្ខជន​មាន​សិទ្ធិ​ចូល​រួម ឬ​មិន​ចូល​រួម​ក្នុង​ការ​បោះ​ឆ្នោត ហើយ​ជា​ពិសេស​មាត្រា ៣៤ នៃ​រដ្ឋធម្មនុញ្ញ​ឆ្នាំ​១៩៩៣ បាន​ចែង​យ៉ាង ច្បាស់​អំពី​សិទ្ធិ​របស់​ពលរដ្ឋ​កម្ពុជា ដែល​មាន​សិទ្ធិ​បោះ​ឆ្នោត និង​មាន​សិទ្ធិ​ឈរ​ឈ្មោះ​ឱ្យ​គេ​បោះ​ឆ្នោត ។ គ.ជ.ប បាន​ត្រៀម​ខ្លួន​រួច​ជាស្រេច​សម្រាប់​ដំណើរ​ឆ្ពោះ​ទៅ​ការ​បោះ​ឆ្នោត​នា​ថ្ងៃ​ទី២៩ ខែ​កក្កដា ឆ្នាំ​២០១៨ ។

គ.ជ.ប ត្រូវ​បាន​ទទួល​ស្គាល់​ជា​ស្ថាប័ន​ឯករាជ្យ និង​អព្យាក្រឹត ជា​ពិសេស​លទ្ធផល​ការ​ងារ​របស់​ខ្លួន​នៃ​ការ​រៀបចំ​ការ​បោះ​ឆ្នោត​សកល​ជ្រើសរើស​ក្រុម​ប្រឹក្សា​ឃុំ សង្កាត់ កាលពី​ថ្ងៃ​ទី៤ ខែមិថុនា ឆ្នាំ​២០១៧ ។ នៅ​ទី​ក្រុង​ប៊្រុយស៊ែល សេចក្តី​ថ្លែង​ការណ៍​រួម​កម្ពុជា​-សហភាព​អឺរ៉ុប ចុះ​ថ្ងៃ​ទី១៤ ខែ​មីនា ឆ្នាំ​២០១៨ បាន​កោតសរសើរ និង​វាយ​តម្លៃ​ខ្ពស់​ចំពោះ​សមិទ្ធផល​នេះ ។

ស្ថានទូតសហរដ្ឋ​អាមេរិក​ប្រចាំ​នៅ​ទី​ក្រុង​​ភ្នំពេញ​​បាន​កោតសរសើរ គ.ជ.ប ដែល​បាន​ខិតខំ រៀបចំ​ការ​បោះ​ឆ្នោត ឃុំ សង្កាត់​​នេះ ប្រកប​ដោយ​របៀបរៀបរយ និង​ស្ងប់ស្ងាត់ ព្រម​ទាំង​បាន​អំពាវនាវ​ឱ្យ​ប្រជា​ពលរដ្ឋ​កម្ពុជា គណ​បក្ស​នយោបាយ និង​ស្ថាប័ន​នានា​នៅ​កម្ពុជា ទទួល​យក​លទ្ធផល​នៃ​ការ​បោះ​ឆ្នោត​ដោយ​ស្ងប់​ចិត្ត ។ ការ​ដែល​សហរដ្ឋ​អាមេរិក និង​សហភាព​អឺរ៉ុប​បាន​ព្យួរ​ជំនួយ​ពី គ.ជ.ប គឺជា​ហេតុ​ផល​ផ្សេង​មិន​មែន គ.ជ.ប ធ្វើ​ការ​មិន​ត្រឹម​ត្រូវ​នោះ​ទេ ។ គ.ជ.ប ក៏​គ្មាន​ហេតុ​ផល​អ្វី​ត្រូវ​បោះ​បង់​ចោល​សមិទ្ធផលជាប្រវត្តិសាស្រ្ត​របស់​ខ្លួន​ដែល​ទទួល​ស្គាល់​ដោយ​សហគមន៍​ជាតិ និង​អន្តរជាតិ  ជា​ពិសេស​អ្នក​ជំនាញ​ការ​របស់​សហរដ្ឋ​អាមេរិក សហភាព​អឺរ៉ុប ជប៉ុន និង​កូរ៉េ​ខាង​ត្បូង ដែល​មានទីស្នាក់​ការ​ផ្ទាល់​ជា​មួយ គ.ជ.ប ជា​យូរ​ឆ្នាំ​មក​ហើយ និង​ដែល​បាន​ស្គាល់​ច្បាស់​ពី​សកម្មភាព​ពិត​របស់ គ.ជ.ប ។ ជាង​នេះ​ទៅ​ទៀត​ដើម្បីតម្លាភាព​ពេញ​ទី ឯកឧត្តម ស៊ិក ប៊ុនហុក ប្រធាន គ.ជ.ប បាន​ស្នើសុំ លោក​ស្រី រ៉ូណា ស្មីត ( Rhona Smith) អ្នក​រាយការណ៍​ពិសេស​របស់​អង្គការ​សហប្រជា​ជាតិ​(UN) ទទួល​បន្ទុក​សិទ្ធិ​មនុស្ស​ប្រចាំ​នៅ​កម្ពុជា ឱ្យ​បង្កើត​ការិយាល័យ UN ប្រចាំ​នៅ គ.ជ.ប សម្រាប់​ការ​បោះ​ឆ្នោត​ឆ្នាំ​២០១៨ នា​ឱកាស​ជំនួបជា​មួយ​គ្នា​កាលពី​ថ្ងៃ​ទី១៣ ខែ​មីនា ឆ្នាំ​២០១៨ ។

គ.ជ.ប មាន​ការ​សោកស្តាយ​ចំពោះ​ការ​លើក​ឡើង​ថា គ.ជ.ប បំ​ពេញ​ការ​ងារ​មិន​បាន​ត្រឹម​ត្រូវ ដែល​តាម​ពិត​ប្រជា​ពលរដ្ឋ​ខ្មែរ​គួរ​តែ​មាន​មោទនភាព​ជាតិ​ចំពោះ​សមិទ្ធផល​ដ៏​ធំ​ធេង​នេះ ៕

It appears your Web browser is not configured to display PDF files. Download adobe Acrobat or click here to download the PDF file.

Click here to download the PDF file.

ទាញយកកម្មវិធី(App) CamNEC News

 

មន្ត្រី​​​ទទួល​បន្ទុក​​គេហទំព័រ​៖ 096 69 09 778