សេចក្ដី​ប្រកាស​ព័ត៌មាន​ លេខ ២០១​៖​ គ.ជ.ប បាន​សហការ​ជាមួយ​ទី​ភ្នាក់ងារ​ប្រតិបត្តិការ​អន្តរជាតិ​ជប៉ុន​ (JICA) រៀបចំ​សិក្ខាសាលា​សម្រាប់​អ្នកសារព័ត៌មាន ស្ដី​ពី​ការ​ធ្វើ​បច្ចុប្បន្នភាព​បញ្ជី​បោះឆ្នោត និង​ការ​ចុះឈ្មោះបោះឆ្នោត​ ឆ្នាំ​២០១៧

នៅថ្ងៃទី១៥ ខែកញ្ញា ឆ្នាំ២០១៧ វេលាម៉ោង ៨:៣០នាទីព្រឹក គណៈកម្មាធិការជាតិរៀបចំការបោះឆ្នោត (គ.ជ.ប) បានសហការជាមួយទីភ្នាក់ងារប្រតិបត្តិការអន្តរជាតិជប៉ុន (JICA) រៀបចំសិក្ខាសាលាសម្រាប់អ្នកសារព័ត៌មាន ស្តីពីការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោត ឆ្នាំ២០១៧  នៅភោជនីយដ្ឋាន ទន្លេបាសាក់២ រាជធានីភ្នំពេញ ក្រោមអធិបតីភាពឯកឧត្តម ហង្ស ពុទ្ធា សមាជិក និងជាអ្នកនាំពាក្យ គ.ជ.ប ។សិក្ខាសាលាធ្វើឡើងមានរយៈពេល ១ថ្ងៃ ដែលមានសិក្ខាកាមរួមមាន ៖ តំណាងក្រសួងមហាផ្ទៃ ក្រសួងព័ត៌មាន ស្ថានីយទូរទស្សន៍ចំនួន ៨ ស្ថានីយ៍វិទ្យុចំនួន ១១ គេហទំព័រចំនួន ៤ និងអង្គភាពសារព័ត៌មានចំនួន ៤ សរុបចំនួន ៥៥នាក់ ព្រមទាំងមានជំនាញការ JICA ជំនាញការសហភាពអឺរ៉ុប (EU) ជំនាញការ IFES និងជំនាញការ KOICA ចូលរួមជាភ្ញៀវកិត្តិយសផងដែរ។ឯកឧត្តម ហង្ស ពុទ្ធា មានប្រសាសន៍ក្នុងពិធីបើកសិក្ខាសាលានេះថា អ្នកសារព័ត៌មាន គឺជាតួអង្គដ៏ សំខាន់មួយដែលបានរួមចំណែកយ៉ាងសកម្មក្នុងការផ្សព្វផ្សាយព័ត៌មានដល់សាធារណជន និងអ្នកបោះឆ្នោត។   ឯកឧត្តមបន្តថា អ្នកសារព័ត៌មានត្រូវប្រកាន់ជំហរអព្យាក្រឹត មិនលំអៀងទៅរកគណបក្សនយោបាយណាមួយ ជាពិសេសជៀសវាងការផ្សព្វផ្សាយព័ត៌មានណាដែលនាំឱ្យមានការភាន់ច្រឡំដល់សាធារណជន និងនាំឱ្យមានការបាត់បង់ទំនុកចិត្តលើការបោះឆ្នោត។  មានមតិសំណេះសំណាលក្នុងសិក្ខាសាលានេះដែរលោកស្រី អ៊ីម៉ៃ តាកាកុ (Ms. IMAI TAKAKO)   ទីប្រឹក្សាអង្គការ JICA ប្រចាំនៅ គ.ជ.ប បានលើកឡើងថា អ្នកសារព័ត៌មានជាភ្នាក់ងារដ៏សំខាន់ក្នុងការនាំសារអប់រំពាក់ព័ន្ធនឹងការចុះឈ្មោះបោះឆ្នោតទៅកាន់ ប្រជាពលរដ្ឋ។ លោកស្រីបន្តថា ដើម្បីសរសេរអត្ថបទរបស់ខ្លួនបានច្បាស់លាស់ និងត្រឹមត្រូវ អ្នកព័ត៌មានត្រូវស្វែងយល់អំពីបទបញ្ជា និងនីតិវិធីនៃការចុះឈ្មោះបោះឆ្នោត។ សិក្ខាសាលានេះ គ្រូឧទ្ទេសបានធ្វើបទបង្ហាញលើប្រធានបទចំនួន ៦ រួមមាន ៖

  • ភាពខុសគ្នារវាងការចុះឈ្មោះបោះឆ្នោត ឆ្នាំ២០១៦ និង២០១៧
  • ការចុះឈ្មោះបោះឆ្នោត ឆ្នាំ២០១៧ តាមប្រព័ន្ធកុំព្យូទ័រ និងការបញ្ជូនទិន្នន័យមក គ.ជ.ប
  • ការធ្វើបច្ចុប្បន្នភាពបញ្ជីបោះឆ្នោត និងការផ្ទៀងផ្ទាត់ទិន្នន័យអ្នកចុះឈ្មោះបោះឆ្នោតនៅ គ.ជ.ប
  • ការអប់រំអ្នកបោះឆ្នោត
  • ការដាក់ ការទទួល និងការដោះស្រាយពាក្យបណ្តឹងទាក់ទងនឹងការចុះឈ្មោះបោះឆ្នោត និងការបិទផ្សាយបញ្ជីបោះឆ្នោតដំបូង
  • តួនាទីរបស់អ្នកសារព័ត៌មានក្នុងការផ្សព្វផ្សាយអប់រំអ្នកចុះឈ្មោះបោះឆ្នោត។

ឯកឧត្តម ទេព នីថា អគ្គលេខាធិការ គ.ជ.ប ថ្លែងក្នុងកម្មវិធីបិទសិក្ខាសាលាថា នេះជាលើកទី៣ហើយដែល គ.ជ.ប សហការជាមួយអង្គការ JICA រៀបចំសិក្ខាសាលានេះឡើង។ ឯកឧត្តមបន្តថា សិក្ខាសាលានេះ សំដៅដល់ការពង្រឹង និងបង្កើនការយល់ដឹងរបស់អ្នកសារព័ត៌មាន ឱ្យដឹងពីអ្វីដែលទាក់ទងនឹងដំណើរការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោត ឆ្នាំ២០១៧ ដើម្បីផ្សព្វផ្សាយជូនដល់ប្រជាពលរដ្ឋដែលជាម្ចាស់ឆ្នោត។ ឯកឧត្តមសង្ឃឹមថា អង្គភាពសារព័ត៌មាន អ្នកសារព័ត៌មាននឹងចូលរួមធ្វើការផ្សព្វផ្សាយតាមក្រមសីលធម៌ដែលបានកំណត់ដោយ គ.ជ.ប ៕

It appears your Web browser is not configured to display PDF files. Download adobe Acrobat or click here to download the PDF file.

Click here to download the PDF file.
ចែករំលែក(Share)
មន្ត្រី​​​ទទួល​បន្ទុក​​គេហទំព័រ​៖ 096 69 09 778